Sihphir Presbyterian Kohhran

Kohhran lo din chhoh dan leh than zel dan:

Sihphir Kohhran Committee chuan Pi Hauchhungi leh a faten Rev. D.E. Jones (Zosaphluia) kuta Baptisma an chan ni December ni 25, 1910 chu Sihphir Kohhran din tan niah pawmin, kum 2010 khan Kohhran Centenary theih ang tawka ropuiin a lo lawm tawh a. Mizorama Kohhran upa pawl takte zingah telin Kohhran thang duang leh Pathian nmalsawmna dawng tak Kohhran a ni zui a. Rawngbawltu engemaw zat leh Kohhran dang hringtu pawimawh tak a ni a. Sihphir Kohhran atang hian Kohhran pathum Sihphir

Vengthar (1967), Sihphir Hmarveng (1989) bakah Sihphir Venglai (1991) Kohhran-te an in dang tawh a. Kum 1961 atangin Pastor thutchilh Kohhran niin, Pastor bial pawh Mizoramah a hmasa pawlte zinga mi a ni bawk.

Kohhran In-te:

Sihphir Kohhran Biak In hmasa ber chu tuna Pu PC. Thanbanglova in (SBI in an luah) ah hian sak a ni a. Kum 1911-a Mizoram Presbytery (tuna Synod Inkhawmpui ni ta) Minute-ah chuan "Sihphir khuain Diakawn (hman deuha Upa sawina, kum 1913 atangin Upa tih zui tak) leh inkhawmna in an duh a, an nei thei ang tih an remti tlang a; an Diakawn/Upa thlanpui turin  Tuahkima leh Rosema te kan ruat (Presby Oct.1911, No 1)" tih a chuang a (Synod Thurel lakkhawm Volume I page 69 & 208).

Tuna inkhawmpui kan hman mekna Biak in hi Sihphir Kohhranin Biak in a sak tum 7-na a ni a. Kum 1992 March ni 19 (Ningani) ah Synod Moderator Rev. Lalpianga'n lung a phum a. Kum 1996 September ni 28 (Inrinni)-ah Rev. Dr. Zairema'n a hawng a ni. Biak in bul maiah hian Kohhran Centenary Hall building, Kum 2010 a Kohhran Centenary lawmna puala sak a ding a. A hnuaiah hian Sunday School Department hrang hrang inkhawmna tur floor hnih a awm bawk a. Hall bulah hian Choka leh Tuikhuah lian pawh

sak tel nghal a ni bawk. Hei bakah hian Biak in leh Pastor Quarters inkarah Gospel Centenary Hall a ding bawk a. A bul maiah Presbyterian English School building sak mek a ding a. Tunah hian floor hnih sak zawh a, luah tawh a ni a. La sak chhunzawm zel tur a ni bawk.

Kohhrana rawngbawltu dinhmun:

Sihphir Kohhran Upa hmasa ber te chu - Khamngova, Laipawnga leh Sikhuma te niin 1912 October ni 5-ah nemngheh an ni a (Synod Thurel lakkhawm Volume I page 70). Kum 2025 thleng hian Kohhran Upa neih tawh zat chu 40 niin tunah hian active Upa 14 leh Tual Upa 6 an awm mek.

Rawngbawltu chhuak mekte:

Sihphir Kohhran atang hian Pastor hna thawk mek 3, Pastor Lalthanhawla (Chaplain ZMC & H), Pastor C. Lalremruata (Kolkata bial) Pastor Isak Lallawmkima (Bairabkunda bial) leh Pro. Pastor 1, Pro. Pastor R. Vanhmingmawia (Zawlpui bial) an chhuak mek a. Ram thim vei Kohhran tia mite hriat hlawh Kohhran ni vein Missionary a chhuak thahnem tak an awm tawh a. Eng emaw zat pension tawhin tunah hian Missionary thawk mek hi 11 an awm.

Tualchhunga hmalakna lian zualte:

Kristian Chhungkua, Sunday School, Social Front etc. te hmalakna bakah Tualchhung lama hmalakna chhuanawm tak pakhat chu- Pathianni apiangin mi harsa tanpui nan bawm dawh thin niin, chumi tling khawm hmang chuan in hmun nei si, sakna tur sum nei lo, in pathum ngawt sak tawh niin, in pakhat sa leh turin ruahmanna kalpui mek a ni a. Kohhran mipuite he rawngbawlna ah hian an phur tlang hle.

Kum 2014 atangin Presbyterian English School dinin, tunah hian Class VIII thleng hawn tawh a ni a. Zirtirtu 13-in zirlai 245 an enkawl mek a. Kohhran hma lam hun atan rawngbawltu leh kohhran mi chher chhuahna pawimawh tak a nih zui ngei kan beisei.

Synod Inkhawmpuiin Kohhran te leh harsa dawm chhuah ni se a tih kalpuiin Sihphir Kohhran in a enkawl chu Damdep II Branch Church a ni a. Biak In thutthleng leh Sound System te leisakin, theih ang tawkin a enkawl mek.

Rawngbawltu thut chilh tawh tute:

Synod rawngbawltu pawimawh engemaw zatin Sihphir Kohhran hi an thutchilh tawh thin a. A hmasa lam hi Synod Inkhawmpui Thurel atanga a lan dan chuan, Kum 1929 Assembly No 11 ah chuan. "Zawna hian a Tirhkoh hna zir a lo puitlin tak avangin (nemngheh nghal a ni a) a chhuak ang a, Durtlang Bial, Sihphir khuaah  a awm ang" (Synod Thurel Lakkhawm page no. 51) tih kan hmu.

Sihphir Kohhran Bialtu Pastor ni tawhte:

1. Pastor Chhuahkhama ................... 1914-1924

2. Pastor Saiaithanga ........................ 1925-1950

3. Pastor Buanga .............................. 1951-1960

4. Pastor Sakhawliana ...................... 1959

5. Pastor Hranghnuna ...................... 1961-1972

6. Pastor Lalbiakvela ........................ 1973-1976

7. Pastor Lalbiaktluanga ................... 1977

8. Pastor S. Lalmuana ...................... 1978-1986

9. Pastor Sanghnuna ........................ 1987-1991

10. Pastor C. Satliana ......................... 1992-2000

11. Pastor G. Chhunthuama .............. 2001-2007

12. Pastor John Raldosanga ................ 2008-2012

13. Pastor H. Laltlanthanga ............... 2013-2017

14.  Pastor C. Sapkaia ........................ 2018-2022

15. Pastor H. Lalzuiliana .................... 2023-

Kum 1986 August - 1987 April thla hian Bialtu Pastor damlohna avangin Pastor Tailinga, Kawnpui Bialtu-in min rawn hmui bawk. Kum 2010 khan Manipur Synod lama Special Pastor training-in Rev. Luttinlel chu a rawn awm tawh bawk.

Sihphir Kohhrana Pro. Pastor lo awm tawhte:

1. P/P Lalhmingmawia .................... 1969

2. P/P Rosiamliana Tochhawng  ....... 1998-2000

3. P/P R. Vanlalngena ...................... 2005-2007

4. P/P Lalduhsaka ............................ 2011-2012

Kohhran leh a hnuaia Committee hrang hrangte :

Kohhran rawngbawlna tichak a, a bika hma la turin Kohhran Committee hnuaiah pawl hrang hrang din a ni a.

Kohhran Hmeichhia:

Kohhran din rualin Kohhran Hmeichhia hi a ding ve nghal em tih hriat theih ni lo mah se hruaitu hmasate hriat danin kum 1949 vel khan Kohhran Hmeichhia hi ding tawh ngeiin hriat a ni a. A hranin inkhawmte pawh an lo nei tawh thin a, Committee-te pawh an lo thu tawh thin a. Kohhran rawngbawlna tichaktu  pawimawh tak niin kum 2025 hian Member 771 an ni mek.

Kristian Thalai Pawl:

Kum 1951-ah thalaite a hranin an lo inkhawm tawh thin tih Kohhran record atangin hmuh tur a awm a. Kum 1955 March 19ah Branch KTP hminga lo ding tanin rawngbawlna kawngah an thawh hlawk hle a. Kohhran tana chakna hnar pawimawh tak an lo ni chho ta a. An thil tum ang ngeiin Kohhran kut ke pawimawh tak an ni mek a. Kum 2025-ah hian Member 640 an awm mek.

Kohhran Pavalai Pawl:

Kum 2013, February ni 23-ah Kohhran Pavalai Pawl hi din tan a ni a. Hmun remchang danga eng emaw chen an inkhawm hnuin Ni 15 May 2014 atangin Biak Inah an inkhawm tan a. Kohhran-in a beisei ang ngeiin rawngbawlna nung takin an kalpui mek a. Kum 2025 hian Member 187 an awm mek. 

Masihi Sangati:

Kum 1988 atangin hnam dang zinga rawngbawlna hi kalpui a lo ni tawh a. Hnam dangte zinga rawngbawlnaah hian tha thawh nasa leh thawh hlawk hmasa pawl tak kohhran niin, Zaipawl pawh hun rei tawh tak atang khan neih a ni tawh a. Ram pum huap Convention hi tum hnih ngawt Sihphir Kohhran Biak Inah hian nghah a lo ni tawh a. Kar tin Zirtawpni zan apiangin Masihi Sangati-te hi an inkhawm thin a ni. 

Hengho bakah hian Sub Committee pawimawh tak tak; Ramthar Committee, Kristian Chhungkaw Committee, Sunday School Committee, Social Front Committee, Finance Committee, Light & Sound Committee, Music Committee, Building Committee, Sanitation Committee, Property Committee, PES Management Committee, BSI Local Committee, Archive & Documentation Committee te hian mahni hmazawnah \heuh rawngbawlna phur takin an thawk theuh bawk a ni.